Drejtoria e Përgjithshme e Policisë së Shtetit njofton:
Hapen aplikimet për pranim në funksionin e veçantë në Policisë së Shtetit, Specialist/asistent, në Kabinetin e Drejtorit të Përgjithshëm të Policisë së Shtetit (Zyra Ndihmëse), me gradën policore “Kryekomisar”.
Aplikimet fillojnë më datë 08.07.2022 dhe përfundojnë më datë 12.07.2022.
Aplikimet bëhen në Drejtorinë e Burimeve Njerëzore, në Departamentin për Shërbimet Mbështetëse, në Drejtorinë e Përgjithshme të Policisë së Shtetit.
Kriteret e pranimit në funksionin e veçantë, Specialist/asistent, në Kabinetin e Drejtorit të Përgjithshëm të Policisë së Shtetit”, janë:
- Të jetë shtetas shqiptar;
- Të mos jetë i përjashtuar nga Policia e Shtetit, strukturat e tjera të sigurisë kombëtare, apo të jetë larguar nga shërbimi civil.”
- Të ketë përfunduar arsimin e lartë përkatës;
- Të ketë zotësi të plotë për të vepruar;
- Të jetë në gjendje të mirë shëndetësore dhe i aftë fizikisht për të kryer detyrën;
- Të zotërojë gjuhën shqipe të shkruar dhe të folur;
- Të ketë përvojë pune jo më pak se 5 vjet profesionale;
- Të mos jetë i dënuar me vendim gjykate, të formës së prerë, për kryerjen e një krimi apo për kryerjen e një kundërvajtjeje penale me dashje;
- Të ketë dëshmi të aftësisë së drejtimit të automjetit të tipit B;
- Të jetë pajisur me vërtetimin e besueshmërisë;
- Të plotësojë kriteret e tjera të veçanta.
Kritere të veçanta:
Kritere të veçanta që duhet të plotësojë aplikanti për funksionin e veçantë “Specialist/asistent, në Kabinetin e Drejtorit të Përgjithshëm të Policisë së Shtetit (Zyra ndihmëse)”, janë si më poshtë:
- Të ketë përfunduar ciklin e dytë të Arsimit të Lartë, në shkenca shoqërore.
- Të ketë njohuri e kualifikime në gjuhësi, redaktim, sekretari, etj.
- Të ketë eksperiencë pune në fushën organizative dhe teknike për dhënien e asistencës së drejtuesit të institucionit.
- Të zotërojë gjuhën angleze, të vërtetuar me dëshmi.
- Të jetë njohës i programeve kompjuterike.
- Të ketë jo më pak se 5-vjet përvojë pune profesionale.
- Të ketë aftësi të punës në grup dhe aftësi të mira komunikimi dhe prezantimi.
- Të mos ketë pengesa ligjore për t’u pajisur ne certifikatë sigurie personeli.
Aplikanti të paraqesë, në Drejtorinë e Burimeve Njerëzore, dokumentacionin e mëposhtëm:
- Formularin e aplikimit tip (bashkëlidhur këtij urdhri);
- Fotokopje të kartës së identitetit;
- Dokument zyrtar që vërteton përfundimin e arsimit, trajnimeve përkatëse;
- Fotokopje të dëshmisë së aftësisë së drejtimit të automjetit të tipit “B”;
- Certifikatë e gjendjes gjyqësore;
- Certifikatë familjare;
- Vërtetim nga gjykata;
- Vërtetim nga prokuroria;
- Raport mjeko-ligjor;
- Fotokopje e librezës së punës;
- Dokument të lëshuar nga institucionet shëndetësore që vërteton se nuk është përdorues i lëndëve narkotike.
Punonjësi në funksionin e veçantë, “Specialist/asistent, në Kabinetin e Drejtorit të Përgjithshëm të Policisë së Shtetit (Zyra ndihmëse)”, kryen këto detyra specifike:
- Asiston dhe ndihmon Drejtorin e Përgjithshëm të Policisë së Shtetit, në ushtrimin e kompetencave si autoriteti më i lartë ekzekutiv, administrativ dhe operacional i Policisë së Shtetit.
- Sipas detyrave të dhëna nga eprori merr masa organizative dhe teknike për të ndihmuar në ushtrimin e kompetencave si autoriteti drejtues i Policisë së Shtetit.
- Mbajtjen në vijushmëri të kalendarit të punës në lidhje me të gjitha takimet e mundshme të drejtuesit të institucionit në aktivitetet e caktuara, duke ia bërë prezent eprorit.
- Përgatit dhe ndjek programin e aktivitetit në mënyrë të saktë e të përshkruar hollësisht dhe sipas afateve dhe datave të përcaktuara, ndjek realizimin e detyrave.
- Shënon dhe vlerëson të gjithë informacionin e marrë në adresë të eprorit dhe ja sjell në vëmendje Drejtorit të Përgjithshëm të Policisë së Shtetit.Mesazhet që konsiderohen urgjente i bëhen të njohura menjëherë.
- Mban regjistrin për evidentimin e dinamikës e korrespondencës si: porosi të dhëna, afati i kthimit të përgjigjeve, struktura që do të kthejë përgjigje, etj.
- Sjell në vëmendjen e Drejtorit të Përgjithshëm të Policisë së Shtetit, detyra të rëndësishme osë probleme të tjera, të cilat kërkojnë ndërhyrjen dhe angazhimin e tij.
Procesi i konkurrimit përfshin:
- Jetëshkrimi i aplikantit,
Vlerësimi i arsimimit dhe trajnimeve të lidhura me veprimtarinë në fushën e aftësive në lidhje me teknikat dhe metodikat që zbatohen në fushën e kryerjes së veprimtarisë së shërbimeve mbështetëse, si dhe referencat e punëdhënësve të mëparshëm (vlerësohet me 10 pikë);
- Testi me shkrim,
Kontrollin e njohurive të aplikantit në test me shkrim (vlerësohet me 60 pikë). Aplikanti që nuk arrin të marrë 40 pikë në testin me shkrim nuk i nënshtrohet vlerësimit në intervistën me gojë dhe ndërpret procesin e vlerësimit;
- Intervista me gojë,
Vlerësimi i njohurive dhe aftësive komunikuese, eksperiencë pune në lidhje me teknikat dhe metodikat që zbatohen në fushën e kryerjes së veprimtarisë së shërbimeve mbështetëse, si dhe motivimin personal (vlerësohet me 30 pikë).
Në qoftë se asnjë kandidat nuk merr 60% të pikëve, Komisioni i Vlerësimit vendos përfundimin e konkurrimit pa asnjë fitues të përzgjedhur.
Testi me shkrim dhe intervista do të zhvillohet më datë 19.07.2022, në ambientet e Drejtorisë së Burimeve Njerëzore, në Drejtorinë e Përgjithshme të Policisë së Shtetit.