Çako merr pjesë në instruktazhin e punonjësve të policisë që do të angazhohen në marrjen, ruajtjen dhe dorëzimin e objekteve zgjedhore, si dhe ne shoqërimin e materialeve zgjedhore

Çako merr pjesë në instruktazhin e punonjësve të policisë që do të angazhohen në marrjen, ruajtjen dhe dorëzimin e objekteve zgjedhore, si dhe ne shoqërimin e materialeve zgjedhore. (per video kliko mbi link) kom.1

Drejtori i Përgjithshëm i Policisë së Shtetit Drejtues Madhor Haki Çako, i shoqëruar nga Drejtori i Drejtorisë Vendore të Policisë Tiranë, gjatë paradites së sotme mori pjesë në instruktazhin e punonjësve të Policisë të Komisariatit të Policisë Nr. 1 Tiranë, për detyrat që do të kryejnë gjatë marrjes, ruajtjes dhe dorëzimit të qendrave të votimit si dhe shoqërimit të materialeve zgjedhore.

Çako, me trupat e policisë, gjatë instruktazhit:

"Duke ju uruar një shërbim të mbarë, më lejoni t'ju falënderoj për të gjithë angazhimin, por dhe profesionalizmin e treguar deri tani në detyrë, në përballimin e fazës së parë të fushatës elektorale për zgjedhjet në Kuvendin e Shqipërisë ditën e nesërme, datë 25 qershor.

Porositë që përmenda më sipër, janë pasqyruar qartë në librin e xhepit, dhe të duhet që secili prej jush të tregojë një korrektësi absolute dhe profesionalizëm duke komunikuar vetëm në zinxhirin hierarkik të policisë për të bërë të mundur ruajtjen dhe sigurimin e të gjithë procesit zgjedhor.

Është shumë e rëndësishme të kuptojmë që gjithsecili nga ju, gjatë çdo momenti, të harrojë bindjet, të harrojë iniciativat, pasi është e qartë, është e pasqyruar në ligj, por mbi të gjitha është në dinjitetin e organizatës së Policisë së Shtetit dhe në dinjitetin e gjithsecilit prej jush t'a kryejnë me sukses këtë mision shumë të rëndësishëm.

Nga ju, apo nga ne të gjithë, presin të gjithë shqiptarët një proces normal dhe të qetë, ashtu sikurse ka shkuar deri tani.

Unë jam i bindur që profesionalizmi juaj, jo vetëm që do ta justifikojë por do t'i mundësojë që të gjithë shqiptarëve një qetësi në këtë proces.

Ju faleminderit dhe suksese në detyrë".

Më pas Drejtori i Përgjithshëm i Policisë së Shtetit Haki Çako, dha një prononcim për mediat:

" Nga ky moment, në të gjitha strukturat e Policisë së Shtetit, në komisariatet e Policisë dhe në Stacionet e Policisë ka filluar instruktazhi i të gjitha efektivave të policisë për të marrë detyrën në sigurimin e të gjitha objekteve të procesit zgjedhor.

Pothuajse të gjithë drejtuesit e policisë kanë filluar të japin instruktazhin tek shërbimet, te strukturat e policisë, të cilat do të shpërndahen në të gjithë juridiksionin e vendit tonë për të siguruar qendrat e votimit, por edhe ambiente të tjera, në të cilat zhvillohet procesi zgjedhor.

Ne kemi përmbyllur me sukses fazën e parë të procesit zgjedhor, pasi sikurse dihet, detyrimet e Policisë së Shtetit janë para, gjatë dhe pas procesit zgjedhor. Dhe tashmë fillon faza më e rëndësishme, ajo e votimit, që do të zhvillohet nesër në të gjitha njësitë administrative dhe në të gjithë territorin e Shqipërisë ku Policia e Shtetit ka marrë të gjitha masat duke përcaktuar punonjësit e policisë për çdo qendër votimi mbi bazën e detyrimeve të kodit zgjedhor dhe të akteve të tjera normative.

Në mënyrë të veçantë më duhet të theksoj se të gjithë punonjësit e policisë janë të pajisur me një dokument shumë të rëndësishëm, i cili është libri i xhepit, ku pasqyrohen të gjitha detyrat e punonjësve të policisë, për çdo mënyrë veprimi, por mbi të gjitha, marrëdhëniet e vendosura me çdo përfaqësues në qendrën e votimit, por edhe me të gjithë subjektet e tjera si dhe veprimet që do të duhet të kryejnë në rastin e një nevoje ose të një incidenti të mundshëm.

Policia e Shtetit ka marrë të gjitha masat si dhe në Drejtorinë e Përgjithshme të Policisë së Shtetit është ngritur qendra ose salla për menaxhimin dhe koordinimin e procesit zgjedhor ku ka përfaqësues nga të gjitha strukturat e policisë, por njëkohësisht aty asistojnë edhe të gjithë përfaqësuesit dhe ekspertët e misioneve të huaja dhe të misioneve të tjera, që asistojnë Policinë e Shtetit.

Prej disa kohësh, në mënyrë periodike, Task-Forca e ngritur me urdhër të Kryeministrit, që drejtohet nga zv/Kryeministrja, monitoron që të gjitha veprimet e policisë, ku Drejtori i Përgjithshëm i Policisë raporton aty në mënyrë periodike për të gjitha detyrat që janë kryer deri tani.

Më duhet të them se tashmë fillon një fazë që është e rëndësishme për të gjithë shqiptarët, ajo e monitorimit dhe e menaxhimit të së drejtës së votës së qytetarëve shqiptarë.

Ndaj dhe punonjësit e policisë janë porositur të jenë korrektë në kryerjen e detyrës dhe gjej rastin të ftoj që të gjithë qytetarët shqiptarë, por dhe subjektet e kodit zgjedhor, të telefonojnë në numrat përkatës të vendosur, në numrin e gjelbër, 0800 0 129, por edhe në numrat e tjerë, të vendosur si pika kontakti pranë sallës së koordinimit dhe menaxhimit të procesit zgjedhor, por edhe në të gjitha mundësitë e tyre, qofshin këto në portale të ndryshme ose edhe me informacione të ndryshme ku ata mund ta shohin të arsyeshme, për çdo veprimtari të paligjshme, qoftë ajo për iniciativa në kuadrin e krimeve elektorale, por edhe në konstatime të ndryshme që mund të bëjnë, qoftë edhe për punonjësit e policisë të ndryshëm, të cilët konstatohen ose duken qartazi në mosveprim të ligjit ose në shkelje të tij, në kuadër të kodit zgjedhor".

Pyetje: Z.Çako, si do ta vlerësonit fushatën elektorale pasi policia ka garantuar mijëra aktivitete të forcave politike. Si do ta vlerësonit fushatën?

Haki Çako: Faleminderit, por mua s'më takon të vlerësoj fushatat elektorale. Unë vlerësoj vetëm detyrat e kryera nga Policia e Shtetit. Dhe në sajë të vlerësimeve të të gjithë misioneve dhe partnerëve që monitorojnë Policinë e Shtetit, besoj që policia ka qenë në nivelin dhe lartësinë e duhur.

 

kom.2

 

 

kom.3

 

 

kom.4

Arkiva

Nentor 2017
He Ma Me En Pr Sh Di
30 31 1 2 3 4 5
6 7 8 9 10 11 12
13 14 15 16 17 18 19
20 21 22 23 24 25 26
27 28 29 30 1 2 3

Fushata Sensibilizuese

Video te tjera ...